حیدرآباد : مولانا آزاد نیشنل اردو یونیورسٹی میں یونیورسٹی ڈراما کلب کے زیرِ اہتمام ایک تاریخی اور روحانی ڈراما "کربل کتھا" کی شاندار نمائش عمل میں آئی۔ یہ ڈراما ایرانی طرز پر مبنی تھا، جس میں ایک داستان گو ستون پر لیمپ رکھ کر سانحۂ کربلا کے المناک واقعات بیان کرتا ہے، جب کہ ساتھ ہی ساتھ مرثیہ خوانی بھی کی جاتی ہے۔
اسلامی تاریخ کے اس دردناک باب، سانحۂ کربلا کو پیش کرنا جہاں ایک چیلنج تھا، وہیں داستان گو کا کردار ادا کرنے والے محمد فہیم نے اسے غیر معمولی مہارت اور جذباتی انداز میں پیش کیا۔ حاضرین نے ان کی کارکردگی کو بے حد سراہا۔
ڈرامے کے ڈائریکٹر جناب معراج احمد نے اپنی محنت اور لگن سے اس پروجیکٹ کو پایۂ تکمیل تک پہنچایا، جب کہ اس تاریخی ڈرامے کی تحریر ڈاکٹر آصف نقوی نے کی تھی۔
تقریب میں یونیورسٹی کے شیخ الجامعہ عزت مآب پدم شری پروفیسر سید عین الحسن، ڈین اسٹوڈنٹس ویلفیئر سید علیم اشرف جائسی، لٹریری کلب کے صدر ڈاکٹر فیروز عالم اور دیگر معزز مہمانانِ گرامی موجود تھے۔ سبھی نے ڈرامے کی پیشکش کو سراہتے ہوئے اس طرح کے علمی و ثقافتی پروگراموں کے انعقاد کی ضرورت پر زور دیا۔
یہ ڈراما نہ صرف ایک تاریخی واقعے کی یاد تازہ کرنے کا ذریعہ تھا بلکہ اس نے ناظرین کو سانحۂ کربلا کے فلسفے اور اس کے پیغام پر غور و فکر کرنے کی دعوت بھی دی۔
