علی گڑھ: علی گڑھ مسلم یونیورسٹی (اے ایم یو) کے شعبہ غیرملکی السنہ کے جرمن اسٹڈیز سیکشن کے سات طلبہ کو جرمنی کے ڈاڈ اسکالرشپ کے لیے منتخب کیا گیا ہے۔ وہ 2025 میں جرمنی میں سمر کورسز میں حصہ لے سکیں گے۔ ایم اے سال اوّل کے ایک طالب علم مسٹر راغب اور بی اے سالِ سوم کے 6 طلبہ زین العابدین، اظہر ضیاء، عبدالواسع، حریم بیگ، باسل اقبال اور ایم کامران نے جرمن زبان کی مہارت کا آن سیٹ ٹسٹ جو بی ون اور اس سے اوپر کی سطح کا ہوتا ہے پاس کیا۔ یہ اسکالرشپ ٹسٹ گزشتہ 29 اکتوبر 2024 کو اے ایم یو میں منعقد کیا گیا تھا، جس کے لئے شعبہ کے جرمن سیکشن نے دہلی میں واقع جرمن اکیڈمک ایکسچینج سروس(ڈاڈ) دفتر کے ساتھ اشتراک کیا۔

ڈاڈ کے نمائندے اور دہلی یونیورسٹی کے ڈاڈ لیکچرر ڈاکٹر جان ہیلگے وائیڈمین نے پروفیسر ایم این فاروقی کمپیوٹر سنٹر، اے ایم یو میں ٹسٹ کی نگرانی کی۔ ٹیسٹ کے بعد ڈاکٹر جان نے جرمنی میں تعلیم کے مواقع کے موضوع پر معلوماتی خطبہ دیااور بین الاقوامی طلبہ کے لیے جرمنی میں اعلیٰ تعلیم حاصل کرنے کے مواقع، اسکالرشپ اور درخواست دینے کے طریقوں پر روشنی ڈالی۔ منتخب طلبہ جولائی 2025 میں سمر کورسز شروع کرنے کے لیے جرمنی روانہ ہوں گے۔ 2559 یورو کے اس اسکالرشپ میں فضائی کرایہ، رہائش، جرمنی میں تاریخی مقامات کا دورہ اور مہینے بھر کے سمر کورس کی ٹیوشن فیس شامل ہے۔

قابل ذکر ہے کہ گزشتہ سال بھی جرمن اسٹڈیز سیکشن کے دو طلبہ کو مذکورہ اسکالرشپ حاصل ہوئی تھی۔ شعبہ غیرملکی السنہ کے سربراہ اور فیکلٹی آف انٹرنیشنل اسٹڈیز کے ڈین پروفیسر محمد اظہر نے طلبہ کو مبارکباد پیش کرتے ہوئے کہا کہ یہ کامیابی طلبہ کی محنت اور ہمارے اساتذہ کی لگن کو واضح کرتی ہے۔ غیر ملکی زبانوں کی بڑھتی ہوئی مانگ کے ساتھ یہ اسکالرشپ ہمارے خطے میں غیر ملکی زبانوں کے مطالعے کو فروغ دینے میں ایک سنگ میل کے طور پر کام کرے گی۔ جرمن سیکشن کے اسسٹنٹ پروفیسر سید سلمان عباس نے طلبہ کو سراہتے ہوئے کہا کہ ہمارے شعبہ کی تاریخ میں یہ دوسری مرتبہ ہے کہ طلبہ کو ان کے جاری کورس ورک کے حصے کے طور پر اس باوقار اسکالرشپ سے نوازا گیا ہے۔ ہم جرمن اکیڈمک ایکسچینج سروس (ڈاڈ) کا خصوصی شکریہ ادا کرتے ہیں۔ جرمن سیکشن کے اسسٹنٹ پروفیسر ڈاکٹر سبیر پی ایم نے شکریہ کے کلمات ادا کئے۔