حیدرآباد، 18 مارچ (پریس نوٹ) مولانا آزاد نیشنل اُردو یونیورسٹی میں مرکزی جامعات کے مشترکہ داخلہ امتحان(CUET) 2025 کے ذریعے انڈر گریجویٹ ریگولر کورسز میں آن لائن داخلے جاری ہیں۔ داخلہ امتحان کے لیے درخواستیں داخل کرنے کی آخری تاریخ 22 مارچ ہے۔

مانو میں تمام کورسس کا ذریعہ تعلیم اردو ہے۔ یہاں یہ بات قابل ذکر ہے کہNTA نے 16 مارچ کو جاری کردہ اپنے اعلامیہ میں 4 سالہ انٹیگریٹیڈ ٹیچر ایجوکیشن پروگرام(ITEP) (بی اے بی ایڈ، بی کام بی ایڈ، بی ایس سی بی ایڈ) میں داخلوں کے لیے منعقد ہونے والے انٹرنس امتحانت شرکت کے لیے درخواستیں داخل کرنے کی آخری تاریخ میں 31 مارچ 2025 تک توسیع کردی ہے۔

قومی تعلیمی پالیسی 2020 کی روشنی میں چار سالہ یو جی آنرز، ریسرچ پروگرام ملٹی ڈسپلنری طرز میں ایک سے زائد انٹری اور ایگزٹ کے ساتھ گذشتہ برس شروع کیا گیا ہے۔

یو جی ریگولر کورسز میں بی اے (آنرس /ریسرچ) ، بی اے جے ایم سی (آنرس/ ریسرچ) ، بی کام (آنرس/ریسرچ)، بی ایس سی (آنرس/ریسرچ)، بی ووک میڈیکل امیجنگ ٹیکنالوجی ، بی ووک میڈیکل لیباریٹری ٹکنالوجی اور بی ووک میڈیکل ایمرجنسی اینڈ ٹراما ٹیکنالوجی شامل ہیں۔

امیدواروں کوCUET کی ویب سائٹ https://cuet.nta.nic.in/پردستیاب آن لائن درخواست فارم کو پُر کرنا ہوگا۔ یو جی ریگولر کورسز کے لیے تفصیلی پراسپکٹسmanuu.edu.in پر دستیاب ہے۔

پی جی، بی ٹیک، بی ایڈ، ڈی ایل ایڈ، ڈپلوما انجینئرنگ، ریسرچ پروگرامس اور سرٹیفکیٹ کورسس میں داخلے کے لیے یونیورسٹی علیحدہ اعلامیہ جاری کرے گی۔