ممبئی:اداکار عمران ہاشمی کا ماننا ہے کہ فلمی دنیا میں خود کو قابلِ قبول(Relevant) رکھنے کی کنجی کھلے ذہن کے ساتھ نوجوان نسل سے سیکھنے اور ان کے سوچنے اور کام کرنے کے انداز کو سمجھنے میں ہے۔

2000 اور 2010 کی دہائی میں، ہاشمی نے "گانگسٹر"، "دی ڈرٹی پکچر"، "شنگھائی" اور "ٹائیگرز" جیسی فلموں میں اپنی شاندار اداکاری سے خود کو ایک باصلاحیت اداکار کے طور پر منوایا اور "راز"، "مرڈر" اور "جنت" جیسی کامیاب فرنچائزز کے ذریعے تجارتی سطح پر بھی کامیابی حاصل کی۔

ہاشمی کا کہنا ہے کہ خود کو نئے انداز میں پیش کرنا بہت ضروری ہے، اور یہ کام جدید فلم سازوں کے ساتھ کام کر کے ہی ممکن ہے۔جب آپ ایک مخصوص عمر کو پار کر لیتے ہیں اور نئی نسل کے اداکار اور فلم ساز میدان میں آ جاتے ہیں، تب خود کو قابلِ قبول رکھنا بہت ضروری ہو جاتا ہے۔ ان کے اندازِ فکر کو سمجھنا اور اس کے مطابق اپنے آپ کو نئے انداز میں پیش کرنا ہی اصل میں ریلیوینس(relevance) کہلاتی ہے۔جب آپ ان کے ذہنوں کو سمجھنے کی کوشش کرتے ہیں اور کرداروں اور فلمی اصناف پر نیا زاویہ اختیار کرتے ہیں، تب آپ ماضی میں نہیں جیتے، بلکہ خود کو وقت کے ساتھ ہم آہنگ رکھتے ہیں۔ایک اداکار کے طور پر ہاشمی کہتے ہیں کہ انہیں نئے تجربے کرنا اور خود کو چیلنج دینا پسند ہے۔جب میں نے 2017-2018 میں ’بارڈ آف بلڈ‘ کیا تو یہ میرے لیے ایک نیا قدم تھا۔ اگر میں پچھلی کامیابیوں پر اکتفا کرتا رہتا اور کچھ نیا نہ کرتا، تو یہ میری موجودگی کو ختم کرنے کے مترادف ہوتا۔"

46 سالہ اداکار نے فلم انڈسٹری کی موجودہ حالت پر تشویش کا اظہار بھی کیا اور کہا کہ فلم سازوں کو اپنی حکمتِ عملی پر دوبارہ غور کرنے کی ضرورت ہے۔یہ کوئی راز کی بات نہیں کہ ہماری انڈسٹری اس وقت ایک ایسے دور سے گزر رہی ہے جہاں ہمیں دوبارہ سے سوچنا ہوگا کہ ہم کس قسم کی فلمیں بنا رہے ہیں۔ ایسی فلمیں بنانی ہوں گی جو عوام سے جڑی ہوئی ہوں اور جن میں پورے بھارت کی نمائندگی ہو تاکہ زیادہ سے زیادہ لوگ سینما گھروں کا رخ کریں۔اب ہم ایسی فلمیں نہیں بنا سکتے جن میں صرف طبقۂ خواص کے لیے کوئی خاص عنصر ہو، کیونکہ ویسے تصورات اور مغربی طرز کی فلمیں تو او ٹی ٹی پر دستیاب ہیں۔ اس لیے اگر ہم ناظرین کو واپس سینما ہال میں لانا چاہتے ہیں تو ہمیں مکمل طور پر اپنی فلم سازی کے انداز کو بدلنا ہوگا۔انہوں نے مزید کہا کہ فلم انڈسٹری ابھی بھی ناظرین کی توقعات پوری کرنے سے "کافی دور" ہے اور بعض لوگ اس حقیقت کو ماننے کے لیے تیار ہی نہیں کہ ان کا مواد مؤثر نہیں رہا۔لوگ مجھ سے پوچھتے ہیں کہ میں 2019 سے پہلے کی طرح کثرت سے فلمیں کیوں نہیں کر رہا۔ اس کی وجہ یہ ہے کہ جب میں اسکرپٹس سنتا ہوں تو ان میں وہ بات نہیں ہوتی۔ میں کسی کی بے عزتی نہیں کر رہا، مگر حقیقت یہ ہے کہ لوگ ابھی تک اس دور سے نہیں نکلے جب سنگل اسکرین سنیما کا راج تھا، اور جب ملٹی پلیکسز آئے تو فلمیں مغربی انداز کی بننے لگیں۔"

’ٹائیگر 3‘ کے اداکار کا کہنا ہے کہ موجودہ صورتحال نے انہیں مجبور کر دیا ہے کہ وہ فلموں کے انتخاب میں احتیاط اور چناؤ سے کام لیں۔آج کل اگر کوئی فلم ناظرین سے بالکل بھی نہ جڑ سکے، تو یہ بہت تباہ کن ہوتا ہے۔ کچھ کامیاب فلمیں بھی باکس آفس پر ناکام ہو جاتی ہیں، لیکن کم از کم ان کی نیت یہ ہوتی ہے کہ وہ زیادہ سے زیادہ لوگوں تک پہنچیں۔ تو اس وقت جب میں کسی فلم کی اسکرپٹ سنتا ہوں، تو میرے ذہن میں یہی بات ہوتی ہے۔ہاشمی، جن کی حالیہ فلم "ٹائیگر 3" تھی جس میں انہوں نے ولن کا کردار نبھایا، کہتے ہیں کہ اب وہ ایسے کردار بار بار نہیں کریں گے۔میں نے ’ٹائیگر 3‘ اس لیے کی کیونکہ مجھے کردار بہت پسند آیا۔ یہ روایتی ولن کا کردار نہیں تھا، اس کی ایک مکمل پس منظر کہانی تھی۔ لیکن اب میں ویسے مزید کردار نہیں کرنا چاہتا۔اداکار کی اگلی فلم "گراؤنڈ زیرو" ہے، جو 25 اپریل کو سینما گھروں میں ریلیز ہونے جا رہی ہے۔اس ایکشن تھرلر فلم میں سائی تمہنکر اور زویا حسین بھی نمایاں کرداروں میں ہیں، جب کہ ہدایت کاری تیجس دیوسکر نے کی ہے۔ فلم کو فرحان اختر اور رتیش سدھوانی کے بینر ایکسل انٹرٹینمنٹ کے تحت پروڈیوس کیا گیا ہے۔