ممبئی / آواز دی وائس

معروف گیت نگار جاوید اختر نے فلم انڈسٹری میں اپنی جدوجہد کے دنوں کو یاد کیا ہے۔ جاوید اختر نے پرائم ویڈیو دستاویزی سیریز اینگری ینگ مین میں اپنی زندگی سے متعلق کئی انکشافات کیے ہیں۔ انہوں نے یہ بھی بتایا کہ ان کے پاس کبھی اتنا پیسہ نہیں تھا کہ ایک وقت کا کھانا کھا سکے۔

جاوید اختر جذباتی ہو گئے اور بتایا کہ وہ بہت چھوٹی عمر میں اپنا گھر چھوڑ کر ممبئی آئے تھے۔ انہوں نے کہا، میں نے گریجویشن کے بعد فیصلہ کیا کہ میں بمبئی جاؤں گا اور وہاں اسسٹنٹ ڈائریکٹر کے طور پر کام کروں گا۔ مجھے یقین تھا کہ اس طرح شروع کرنے کے چند سال بعد میں ڈائریکٹر بن جاؤں گا۔

ممبئی آنے کے بعد میں کچھ دن اپنے دوستوں کے ساتھ رہا، ریلوے اسٹیشن، پارک، اسٹوڈیو کمپاؤنڈ، کوریڈور اور بینچ پر بھی سوتا رہا۔ کئی بار مجھے پیدل چل کر دادر اور باندرہ جانا پڑا کیونکہ میرے پاس بس کا کرایہ ادا کرنے کے پیسے بھی نہیں تھے۔ کئی بار ہمیں دو دن تک کھانا نہیں ملا۔ پھر میں نے سوچا کہ اگر مستقبل میں مجھ پر کوئی سوانح عمری لکھی جائے تو یہ سب باتیں بہت اہم ہوں گی۔

اہلیہ شبانہ اعظمی نے بھی اسی انٹرویو میں جاوید اختر کی جدوجہد کا ایک واقعہ سنایا اور کہا کہ ایک دن انھیں احساس ہوا کہ انھوں نے تین دن سے کچھ نہیں کھایا۔پھر انہوں نے سوچا، میں ایسے نہیں مروں گا، یہ دن بدل جائیں گے۔

اس کے بعد جاوید اختر نے کہا کہ محرومیاں دو قسم کی ہوتی ہیں نیند اور بھوک۔۔۔ یہ آپ پر اتنا گہرا اثر چھوڑتی ہیں کہ انہیں زیادہ دیر تک مٹایا نہیں جا سکتا۔ اب میں فائیو اسٹار ہوٹلوں میں رہتا ہوں تو سوچتا ہوں کہ جب میں بمبئی آیا تو تھرڈ کلاس کے ڈبے میں بیٹھا تو میرے پاس رہنے کو گھر بھی نہیں تھا۔ میں بہت تھکا ہوا اور دباؤ  میں تھا۔ مجھے صرف تھوڑی سی جگہ چاہیے تھی۔

جاوید اختر کا مزید کہنا تھا کہ ایک دن مجھے احساس ہوا کہ میرے پاس پہننے کے لیے کپڑے بھی نہیں ہیں۔ آپ سوچیں گے کہ یہ کیسے ہو سکتا ہے لیکن ایسا ہی تھا۔ میرے پاس پتلون کا آخری جوڑا تھا جو پھٹا ہوا تھا، میں نے کبھی اپنے گھر والوں سے مدد مانگنے کا نہیں سوچا کیونکہ میں نے سب کچھ پیچھے چھوڑ دیا تھا، میں نے کبھی پیچھے مڑ کر نہیں دیکھا اور نہ ہی اپنے گھر والوں سے کوئی مدد لی۔ میری خالہ نے مجھے پالا، میں نے 15 سال کی عمر میں سب کچھ چھوڑ دیا، لیکن ایسا کرنے کے پیچھے میرے ارادے اچھے تھے۔