آواز دی وائس
گلوکار راحت فتح علی خان کے بارے میں اطلاعات تھیں کہ انہیں دبئی ایئرپورٹ سے حراست میں لے لیا گیا ہے۔ کہا جا رہا تھا کہ طیارے میں سوار ہونے والے راحت فتح علی خان کو روک کر گرفتار کر لیا گیا اور ان سے کئی گھنٹے تک پوچھ گچھ کی گئی۔ لیکن اب راحت فتح علی خان کے انسٹاگرام اکاؤنٹ سے گلوکار کی ایک ویڈیو شیئر کی گئی ہے جس میں ان خبروں کو بے بنیاد قرار دیا جا رہا ہے۔ راحت فتح علی خان نے گرفتاری پر براہ راست کچھ نہیں کہا لیکن لگتا ہے کہ وہ ان خبروں کی تردید کر رہے ہیں۔
راحت فتح علی خان کی ٹیم کی جانب سے شیئر کی گئی ویڈیو میں گلوکار اپنی گرفتاری کی خبر پر وضاحت دیتے ہوئے نظر آرہے ہیں، گلوکار کا کہنا ہے کہ میں اپنے گانے ریکارڈ کرانے دبئی آیا ہوں۔ سب ٹھیک ہے۔ میری آپ سے گزارش ہے کہ افواہوں پر بالکل بھی کان نہ دھریں۔ ایسا کچھ نہیں ہے جو میرے دشمن سوچ رہے ہیں۔ انشاء اللہ میں جلد اپنے ملک واپس آؤں گا، آپ سب کے پاس واپس آؤں گا۔ ان افواہوں پر بالکل یقین نہ کریں۔
اس سے قبل خبر آئی تھی کہ راحت فتح علی خان کے سابق منیجر سلمان احمد نے گلوکار کے خلاف دبئی میں مقدمہ درج کرایا ہے۔ راحت شو کے لیے لاہور سے دبئی گئے تھے۔ اطلاعات آرہی تھیں کہ راحت کو دبئی ایئرپورٹ پر حراست میں لے کر پوچھ گچھ کی گئی۔ تاہم سرکاری طور پر ان کی گرفتاری کی کوئی اطلاع نہیں ہے۔
راحت فتح علی خان نے چند ماہ قبل احمد کو منیجر کے عہدے سے برطرف کردیا تھا جس کے بعد دونوں نے ایک دوسرے پر کئی الزامات لگائے تھے۔
.png)
