ممبئی: بالی وڈ کے مشہور موسیقی کار اور عالمی شہرت یافتہ موسیقار اور گلوکار اے آر رحمان اور ان کی اہلیہ سائرہ بانو میں تقریباً تین دہائیوں بعد علیحدگی ہو گئی ہے۔ یہ خبر بالی ووڈ پر بجلی بن کر گری ہے،دراصل سائرہ بانو کے وکیل وندانا شاہ نے منگل کو جوڑے میں 29 برس بعد علیحدگی کے حوالے سے باضابطہ بیان جاری کیا۔جس میں ان دونوں کے اس باہمی فیصلے کا اعلان کیا گیا تھا ۔ واضح رہے کہ اے آر رحمان اور سائرہ بانو 1995 میں رشتہ ازدواج میں منسلک ہوئے تھے۔ دونوں کے تین بچے ہیں جن میں دو بیٹیاں خدیجہ اور رحیمہ جبکہ ایک بیٹا امین شامل ہیں

موسیقار اے آر رحمان اب تک دو آسکر، دو گریمی اور ایک گولڈن گلوب ایوارڈ حاصل کر چکے ہیں۔ وہ اب تک 145 سے زائد ہندی، انگریزی، تامل، تیلگو، ملیالم اور دیگر زبانوں کی فلموں کی موسیقی ترتیب دے چکے ہیں جن میں آسکر ایوارڈ یافتہ فلم ’سلم ڈاگ ملینیئر‘کے علاوہ ’تال‘ اور عامر خان کی ’لگان‘ اور ‘گجنی‘ جیسی کامیاب فلمیں شامل ہیں

  رحمان اور سائرہ بانو میں علیحدگی کا باضابطہ بیان جاری

 اے آر رحمان نے چند برس قبل کہا تھا کہ اُن کی سائرہ بانو سے ارینجڈ میرج‘ ہوئی تھی اور یہ شادی ان کی والدہ نے کروائی تھی۔ سیمی گریوال سے ایک انٹرویو میں ان کا کہنا تھا کہ ’ان دنوں میں بہت مصروف تھا اور میرے پاس اتنا وقت نہیں تھا کہ میں خود جا کر لڑکی کو دیکھوں۔انہوں نے مزید بتایا تھا کہ ’اس وقت میری عمر 29 برس تھی اور میں نے اپنی والدہ سے درخواست کی آپ میرے لیے دُلہن تلاش کریں۔‘ اے آر رحمان کی بیٹی خدیجہ کی شادی 2022 میں ہوئی تھی اور اس موقعے پر انہوں نے فیملی کی گروپ فوٹو بھی شیئر کی تھی۔