آواز دی وائس
منگل کو اتر پردیش کی غازی آباد عدالت میں سماعت کے دوران زبردست ہنگامہ ہوا۔ کمرہ عدالت میں جج اور وکیل کے درمیان کسی بات پر جھگڑا ہوا۔ اس کے بعد عدالت کے دیگر وکلاء بھی وہاں پہنچ گئے اور ہنگامہ آرائی شروع کر دی۔ اطلاع ملنے پر پولیس پہنچی اور پہلے وکلاء کو سمجھانے کی کوشش کی۔ اس کے بعد پولیس نے وکلاء کو زبردستی ہٹانا شروع کر دیا۔ پولیس نے لاٹھی چارج کیا۔ اسی دوران وکلا نے پولیس پر پتھراؤ بھی کیا۔
لاٹھی چارج اور پتھراؤ میں کچھ وکلاء اور پولیس اہلکار زخمی ہوئے۔ تفصیلات کے مطابق کمرہ عدالت میں ایک ملزم کی درخواست ضمانت کی سماعت جاری تھی۔ اس معاملے میں وکلاء اپنا موقف پیش کر رہے تھے۔ اس دوران سماعت کے دوران جج اور وکیل کے درمیان کسی بات پر گرما گرم بحث ہوئی۔ اس کے بعد مزید وکلاء موقع پر پہنچ گئے اور ہنگامہ آرائی شروع کر دی۔
ہنگامہ آرائی کرتے ہوئے وکلا نے جج پر کرسیاں پھینک دیں جس کے بعد ڈسٹرکٹ جج نے پولیس کو بلالیا۔ پولیس کے لاٹھی چارج سے مشتعل وکلا نے عدالت کی پولیس چوکی میں توڑ پھوڑ بھی کی۔ مشتعل وکلا عدالت کے باہر ہڑتال پر بیٹھ گئے ہیں اور جج کے خلاف نعرے بازی کر رہے ہیں۔ یہ بھی اطلاعات موصول ہوئی ہیں کہ ججز نے بدتمیزی کے خلاف احتجاجاً اپنے کمرے بھی بند کر رکھے ہیں۔ اب عدالتی کارروائی روک دی گئی ہے۔ اپنے مقدمات کی سماعت کے لیے عدالت آنے والے بھی اپنی باری کے منتظر ہیں۔ عدالت کے احاطے میں پولیس کی بھاری تعیناتی ہے۔
اس پورے واقعہ میں 12 وکلاء اور چار پولیس اہلکار زخمی ہوئے۔ وکلا کے ہنگامے کو دیکھتے ہوئے حکام نے موقع پر اضافی پولیس نفری طلب کر لی۔ وہیں سنٹرل ریزرو پولیس کی ایک ٹیم بھی اطلاع پر غازی آباد ڈسٹرکٹ کورٹ پہنچی ہے۔ اس کے علاوہ پی اے سی کے اہلکار بھی تین ٹرکوں میں پہنچے ہیں
.png)
