نئی دہلی: چیف الیکشن کمشنر اور الیکشن کمشنرز کی تقرری سے متعلق قانون کو چیلنج کرنے والی عرضداشتوں پر سماعت کے لیے سپریم کورٹ نے 14 مئی کی تاریخ مقرر کر دی ہے۔ یعنی چیف الیکشن کمشنر اور دیگر الیکشن کمشنرز کی تقرری سے متعلق بنائے گئے نئے قانون کو چیلنج کرنے والی درخواستوں پر سپریم کورٹ اب 14 مئی کو سماعت کرے گا۔

ایک درخواست گزار کی جانب سے پیش ہوئے سینئر وکیل پرشانت بھوشن نے معاملے کی جلد سماعت کی اپیل کی تھی۔ پرشانت بھوشن نے عدالت کو بتایا کہ آج کی روزانہ کارروائی کی فہرست میں یہ معاملہ شامل ہے، لہٰذا اس پر فوراً سماعت کی جائے۔ تاہم جسٹس سوریا کانت، جسٹس دیپنکر دتہ اور جسٹس اُجّول بھوئیاں پر مشتمل بنچ نے سماعت کی تاریخ آئندہ ماہ طے کر دی۔

جسٹس سوریا کانت نے کہا کہ عدالت آج اراضی کے حصول سمیت کئی اہم معاملات پر سماعت کرے گی۔ قابلِ ذکر ہے کہ 19 مارچ کو سپریم کورٹ نے اس معاملے پر 16 اپریل کو سماعت طے کی تھی۔ یہ عرضداشت ایک غیر سرکاری تنظیم (این جی او) ایسوسی ایشن فار ڈیموکریٹک ریفارمز کی جانب سے دائر کی گئی ہے، جس کی پیروی پرشانت بھوشن کر رہے ہیں۔

درخواست میں پوچھا گیا ہے کہ چیف الیکشن کمشنر کی تقرری میں سپریم کورٹ کی آئینی بنچ کے اس فیصلے کو مانا جانا چاہیے، جس میں کہا گیا تھا کہ تقرری کمیٹی میں وزیرِ اعظم، اپوزیشن لیڈر اور ملک کے چیف جسٹس شامل ہوں گے، یا پھر 2023 میں بنایا گیا نیا قانون نافذ العمل ہوگا، جس میں چیف جسٹس کو اس کمیٹی سے باہر کر دیا گیا ہے۔