آواز دی وائس

مغربی بنگال کی وزیر اعلیٰ ممتا بنرجی نے بنگلہ دیش کی حکومت سے درخواست کی کہ وہ ریاست کے 84 ماہی گیروں کو رہا کرے جنہیں حال ہی میں بین الاقوامی سرحد عبور کرنے پر گرفتار کر کے جیل بھیج دیا گیا تھا۔ ریاستی سیکرٹریٹ میں گفتگو کرتے ہوئے انہوں نے کہا کہ بنگلہ دیش کے ساتھ ہندوستان کی بہت اچھی دوستی ہے، حال ہی میں دو ماہی گیری کے ٹرالر بنگلہ دیشی سرحد میں داخل ہوئے، جس کی وجہ سے 36 ماہی گیروں کو گرفتار کیا گیا۔ اس کے بعد مزید تین ٹرالر 48 ماہی گیروں کے ساتھ غلطی سے سرحد پار کر گئے جس کی وجہ سے انہیں بھی گرفتار کر کے جیل میں ڈال دیا گیا۔

ممتا نے اسے دونوں ممالک کے درمیان مضبوط دوستی اور تعاون کا معاملہ قرار دیا۔ انہوں نے کہا کہ بنگلہ دیش ہمارا دوست ہے، وہی زبان بولتے ہیں، ایک ہی کھانا کھاتے ہیں اور ایک ہی کپڑے پہنتے ہیں۔

یہ جاننا ضروری ہے کہ سرحد پار کرنے کی اصل وجہ کیا ہے، وزیراعلیٰ

انہوں نے بنگلہ دیشی حکومت سے درخواست کی کہ وہ ہندوستانی ماہی گیروں کے بارے میں سوچے۔ بنرجی نے یہ بھی کہا کہ ممکن ہے کہ ماہی گیروں نے انجانے میں سرحد پار کی ہو یا اس کے پیچھے کوئی اور وجہ ہو۔ہمیں یہ معلوم کرنا ہوگا کہ وہ غلطی سے گئے یا اس کے پیچھے کچھ اور وجوہات ہیں۔ انہوں نے اپنی ہمدردی ظاہر کرتے ہوئے کہا کہ ہم جو کچھ قانونی طریقے سے ہو سکتا ہے وہ کر رہے ہیں۔ متا نے اس سے قبل بھی ماہی گیروں کو پڑوسی ممالک کے پانیوں میں نہ جانے کی تنبیہ کی تھی اور کہا تھا کہ موجودہ سیاسی صورتحال کو دیکھتے ہوئے انہیں محتاط رہنا چاہیے۔

سیاسی چہرے بدل گئے ہیں لیکن حالات پھر سے بہتر ہوں گے

وزیر اعلیٰ نے یہ بھی بتایا کہ تین روز قبل ایک بنگلہ دیشی ٹرالر بنگال کے پانیوں میں الٹ گیا تھا جس کے چار ماہی گیروں کو ہندوستانی کوسٹ گارڈ نے بچا لیا تھا۔ ممتا نے کہا کہ بنگلہ دیشی ماہی گیروں کو اس لیے رہا کیا گیا کیونکہ ان کے پاس درست دستاویزات تھے۔ انہوں نے کہا کہ دونوں ممالک کے درمیان اچھے تعلقات برقرار رکھنا ضروری ہے، کیونکہ اس کے ذریعے بہت سے مسائل کو جلد اور آسانی سے حل کیا جا سکتا ہے۔ ان کا مزید کہنا تھا کہ ’سیاست میں چہرے بدل جاتے ہیں لیکن ہمیں امید ہے کہ حالات پھر سے بہتر ہوں گے اور ہمارے تعلقات مزید مضبوط ہوں گے۔