تاشقند: وزیر دفاع راج ناتھ سنگھ نے بدھ کو شنگھائی تعاون تنظیم(SCO) کے رکن ممالک کے وزرائے دفاع کے سالانہ اجلاس میں شرکت کی۔

ملاقات کے دوران شنگھائی تعاون تنظیم کے رکن ممالک کے درمیان دفاعی تعاون کے معاملات زیر بحث آئے۔ راج ناتھ سنگھ تین روزہ سرکاری دورے پر تاشقند میں ہیں۔

تاشقند میں اپنے قیام کے دوران وزیر دفاع آنجہانی وزیر اعظم لال بہادر شاستری کی یادگار پر بھی خراج عقیدت پیش کریں گے اور ازبکستان میں مقیم ہندوستانیوں سے ملاقات کریں گے۔

گزشتہ ماہ، وزیر خارجہ ڈاکٹر ایس جے شنکر نےایس سی او   وزرائے خارجہ کی کونسل کے اجلاس میں شرکت کے لیے ازبکستان کے قائم مقام وزیر خارجہ ولادیمیر نوروف کی دعوت پر تاشقند کا دورہ کیا۔

ہندوستان کے علاوہ چین، قازقستان، کرغزستان، پاکستان، روس، تاجکستان اور ازبکستان کے وزرائے خارجہ نے بھی شرکت کی۔

اجلاس میں 15-16 ستمبر کو سمرقند میں منعقد ہونے والے سربراہان مملکت کے آئندہ ایس سی او سربراہی اجلاس کی تیاریوں پر تبادلہ خیال کیا گیا۔