سری نگر/ آواز دی وائس
جموں و کشمیر کے پہلگام میں منگل کے روز ہونے والے دہشت گرد حملے نے پورے ملک کو ہلا کر رکھ دیا ہے۔ میڈیا رپورٹس میں دعویٰ کیا جا رہا ہے کہ دہشت گردوں نے مذہب پوچھ کر لوگوں کو نشانہ بنایا، جس کے نتیجے میں زیادہ تر ہندو سیاح مارے گئے۔ تاہم، اس حملے میں مسلم کمیونٹی کے بےگناہ شہری بھی نشانہ بنے، جن میں سے ایک تھے سید حسین شاہ — جو اننت ناگ ضلع کے رہنے والے اور پہلگام میں گھوڑا چلا کر سیاحوں کی سیر کرانے والے ایک محنتی نوجوان تھے۔
حسین شاہ کے خاندان پر اس سانحے نے غم کا پہاڑ توڑ دیا ہے۔ ان کا گھر ماتم میں ڈوبا ہوا ہے، اور ان کی والدہ روتے روتے نڈھال ہو چکی ہیں۔ وہ بار بار یہی کہہ رہی ہیں — ہائے اللہ، اب کیسے زندگی گزرے گی۔۔۔ وہی تو اکیلا کمانے والا تھا۔
سید حسین شاہ کے والد، سید حیدر شاہ نے بتایا کہ حسین ہی خاندان کا واحد کفیل تھا۔ وہ خود بیمار رہتے ہیں اور کام کرنے کے قابل نہیں ہیں۔ حسین کے دو چھوٹے بھائی بھی ہیں۔
انہوں نے بتایا کہ حسین حسبِ معمول منگل کی صبح گھر سے کام کے لیے نکلا تھا۔ دوپہر کے بعد جب انہیں پہلگام میں دہشت گرد حملے کی خبر ملی، تو وہ گھبرا کر بیٹے کو فون کرنے لگے، مگر اس کا موبائل بند تھا۔ کچھ دیر بعد فون آن تو ہوا، لیکن کال نہیں اٹھائی گئی۔
پھر انہوں نے کچھ مقامی لڑکوں کو تھانے بھیجا تاکہ بیٹے کا پتا چل سکے۔ وہاں سے جو خبر آئی، اس نے پورے خاندان کو توڑ کر رکھ دیا — حسین شاہ کو دہشت گردوں نے گولی مار دی تھی۔ پہلے اسے اسپتال لے جایا گیا، لیکن بعد میں اس کی موت کی اطلاع آ گئی۔
سید حسین شاہ ان 28 افراد میں شامل تھے جنہوں نے اس حملے میں جان گنوائی۔ مرنے والوں میں دو مقامی شہری بھی شامل تھے — جن میں سے ایک حسین تھے۔
میڈیا سے بات کرتے ہوئے سید حیدر شاہ نے حکومت سے انصاف کی اپیل کی۔ انہوں نے کہا کہ ہم چاہتے ہیں کہ مجرموں کو سخت سے سخت سزا دی جائے، تاکہ کوئی اور خاندان اس طرح نہ بکھرے۔
