ملتان : پاکستان اور ویسٹ انڈیز کے درمیان کھیلا گیا سیریز کا پہلا ٹیسٹ میچ کرکٹ کی تاریخ کا 2577 واں میچ تھا، اور اس میں پاکستان کی شاندار کامیابی کے ساتھ ساتھ اس میچ کی تاریخ میں اپنی نوعیت کا ایک اور اہم مقام بھی تھا۔ اس میچ میں کل 125.1 اوورز یعنی 751 گیندوں میں نتیجہ آیا، جو کرکٹ کی تاریخ کے مختصر ترین میچوں میں سے چوتھا مختصر ترین میچ تھا۔پاکستانی ٹیم نے اس میچ کو تیسرے دن 127 رنز سے جیتا، جس میں آف اسپنر ساجد خان نے کلیدی کردار ادا کرتے ہوئے نو وکٹیں حاصل کیں۔ اس کامیابی میں پاکستانی سپنرز ساجد خان، ابرار احمد اور نعمان علی کا اہم کردار رہا، کیونکہ اس میچ کی تمام 20 وکٹیں پاکستانی سپنرز نے ہی حاصل کیں۔

یہ میچ اس لحاظ سے بھی تاریخی تھا کہ پاکستان کے اسپنرز نے ویسٹ انڈیز کے بلے بازوں کو پوری طرح قابو کرلیا اور میچ کو صرف تین دن میں ختم کردیا۔ اسی دوران، ٹیسٹ کرکٹ کی تاریخ کا مختصر ترین میچ انڈیا اور جنوبی افریقہ کے درمیان جنوری 2024 میں کیپ ٹاؤن میں کھیلا گیا تھا، جس میں صرف 81 اوورز میں میچ کا فیصلہ ہوا تھا۔

اس فہرست میں دوسرے نمبر پر ساؤتھ افریقہ اور آسٹریلیا کے درمیان 1982 میں میلبرن میں کھیلا گیا میچ آتا ہے، جو 107 اوورز میں ختم ہوا تھا، اور تیسرے نمبر پر ویسٹ انڈیز اور انگلینڈ کے درمیان 1935 میں برج ٹاؤن میں کھیلا گیا میچ تھا جو 112 اوورز میں اختتام پذیر ہوا تھا۔