‘زبان و ادب’ کے عنوان سے کتاب میں شامل باب میں خشک ادبی موضوعات کے بجائے ان موضوعات کو جگہ دی گئی ہے کہ جنکو ادب کے عوامی سروکار کہا جا سکتا ہے۔مثلاً ‘کتاب بینی اور تلاش علم’ کے عنوان سے جو مختصر تحریر اس باب میں شامل ہے اس میں فروری2015میں نئی دلّی میں منعقد عالمی کتاب میلے کو موضوع گفتگو بنایا گیا ہے،لیکن اس بہانے اردو قارئین میں کتب بینی کے کم ہوتے شوق اور کتب بینی کی اہمیت پر بہت کم الفاظ میں پر مغز بحث کرتے ہوئے یہ نتیجہ پیش کیا گیا ہے کہ،‘‘کتابیں صدیوں کی معلومات اور تجربات کا خزانہ ہیں۔یہ ماضی اور حال کے درمیان رابطے کی کڑیاں ہیں۔ کتابیں پرھ کر ہمیں اندازہ ہوتا ہے کہ جذبہ و احساس،فکر وخیال،تاثر و تجزیے،رد عمل اور اظہار خیال کی بے شمار شکلیں ہیں،اور ہر مصنف اور تخلیق کار اپنا الگ انداز رکھتا ہے۔کتابوں کے بغیر علوم و فنون کی تکیل وترسیل ناممکن ہے۔بے علم حکمرانوں کے دور میں کسی سرکاری رسالے میں سرکاری صحافت کرتے ہوئے کتب بینی کی اہمیت کو اجاگر کرنا حسن ضیاء کے صحافتی شعور اور علمی و ادبی سروکاروں سے ان کی گہری وابستگی کا ہی ثبوت ہے۔اب اسی باب کی دیگر تحریروں کے موضوعات پر بھی ایک سرسری نگاہ ڈالیں،اور دیکھیں کہ کس طرح ایک ذہین صحافی نے اپنے قلم کو ‘‘غلامی’’ سے بچاتے ہوئے اپنے صحافتی فرائض کو ادا کیا ہے۔ڈیجیٹل انقلاب اورکتابیں’،‘مہاتما گاندھی اور ہندوستانی زبان ایک سے زائدزبانوں کا علم’،‘اردو کے بنیادی مسائل’،‘اردو اور قومی یکجہتی’،‘مستقبل کا معاشرہ اور ادب’ایسے موضوعات نہیں ہیں کہ جو صرف خواص کے ادبی ذوق کی ترجمانی کرتے ہوں بلکہ یہ تمام موضوعات ہمارے سماج کے عام تعلیمی اور معاشرتی مسائل و سروکاروں پر بھی ہمارے ذہن کو بیدار کرتے ہیں۔

اسی باب میں ایک پر مغز مضمون ‘استادِ میرـ:سعادت امروہوی’کے عنوان سے بھی شامل ہے۔حسن ضیاء نے یہ مضمون لکھ کر اپنے ہم وطن اور میر جیسے عظیم شاعر کو ریختہ میں شعرگوئی کی طرف راغب کرنے والے شاعر کی عظمت کو خراج تحسین پیش کیا ہے۔‘غالبیات’کے عنوان سے شامل باب میں غالب کی شخصیت کے کئی اہم پہلوؤں کو موضوع گفتگو بنایا گیا ہے۔ان مضامین سے حسن ضیاء کے ادبی شعور کا اندازہ ہوتا ہے۔

‘تحریک آزادی،آئین اور اور گاندھیائی ادب’اس اعتبار سے کتاب کا بہت اہم باب ہے کہ اس میں زیر بحث لائے گئے موضوعات موجودہ حکمرانوں کے ایجنڈے میں غیر اہم اور ناپسندیدہ ہوتے جا رہے ہیں،لیکن حسن ضیاء نے اپنے صحافتی شعور کو ایسے موضوعات اور سرکاری صحافت کے بوجھ تلے بھی کمزور نہیں ہونے دیا۔انھوں درباری میڈیا کے اشتعال انگیز موضوعات سے دامن بچاتے ہوئے اس آئین کے اہم پہلوؤں پر گفتگو کی ہے کہ جو حکمرانوں کی پیشانی پر بل ڈال دیتے ہیں۔یہ الگ بات کہ ایسے موضوعات کی کھلی مخالفت کا حوصلہ ان میں بہرحال نہیں ہے۔اس باب میں ‘جنگ آزادی’،تحریک آزادی،آئین،جمہوریت،یومِ آزادی،مہاتما گاندھی،مہاتما گاندھی کا تصور آزادی اور آزادی سے متعلق ادب پر شذرات شامل ہیں۔‘ہمارا آئین’کے عنوان سے جو مختصر مضمون اس باب میں ہے وہ ماہنامہ ‘آجکل’جنوری2021کا اداریہ ہے۔اس مختصر تحریر میں حسن ضیاء نے آئین کی اہمیت پر بات کرتے ہوئے جس انداز سے حکمرانوں کی آمریت کو رد کیا ہے وہ ان کی فکری پختگی کاثبوت ہے۔لکھتے ہیں،‘‘اس بات کا انحصار با اختیار انسانوں پر ہے کہ وہ دوسرے انسانوں کی آزادی سلب کرنے کی کوشش نہ کریں۔’’‘متفرقات’ کے باب میں کورونا سے متعلق چند تحریرں شامل ہیں، لیکن سب سے اہم بات یہی ہے کہ حسن ضیاء نے اپنی بیشتر تحریروں میں اپنے اس جمہوری اور صحافتی شعور کو تماتر سرکاری حدود کے درمیان بھی زندہ رکھا ہے کہ جسے ہماری موجودہ صحافت کے بڑے حصّے نے گنواکر خود کو ‘‘گودی میڈیا’’ کی صف میں کھڑا کر لیا ،اور یہ کام صرف وہی قلمکار کر سکتا ہے کہ جس نے اپنے ضمیر کی آواز کو زندہ رکھتے ہوئے اور عوامی سروکاروں کو سامنے رکھتے ہوئے اپنے صحافتی فرائض  انجام دیے ہوں۔حسن ضیاء ایسا کرنے میں کامیاب ہوئے ہیں۔