.webp "بھجن گائیک بتول بیگم کو ملا پدم شری")
جئے پور: جئے پور کی مشہور لوک گائیکہ بتول بیگم کو اس سال پدم ایوارڈ سے نوازا جائے گا۔ یومِ جمہوریہ کی شام کو اس کا باضابطہ اعلان کیا گیا۔ بتول بیگم اپنی منفرد موسیقی اور فرقہ وارانہ ہم آہنگی کے لیے مشہور ہیں۔ مسلمان برادری سے تعلق رکھنے کے باوجود وہ شری رام اور گنپتی کے بھجن گاتی ہیں اور راجستھانی مانڈ گائیکی میں ماہر مانی جاتی ہیں۔ یہ ایوارڈ انہیں بھارتی لوک موسیقی کو عالمی سطح پر پہچان دلانے اور سماج میں بھائی چارے کا پیغام پھیلانے کے لیے دیا جا رہا ہے۔
جئے پور کی رہنے والی بتول بیگم لوک موسیقی کی دنیا میں ایک معتبر نام ہیں۔ وہ نہ صرف گاتی ہیں بلکہ کئی روایتی لوک ساز بھی بجاتی ہیں۔ راجستھانی لوک موسیقی میں ان کا تعاون بے مثال ہے۔ انہوں نے بھارت اور بیرون ملک کئی اسٹیجز پر اپنی موسیقی کا جادو بکھیرا ہے اور ملک کے ثقافتی ورثے کی نمائندگی کی ہے۔
بتول بیگم کی خاصیت یہ ہے کہ وہ ہر مذہب اور ثقافت کا احترام کرتی ہیں۔ وہ ہندو دیوی دیوتاؤں کے بھجن گانے کے ساتھ ساتھ مسلم مانڈ گائیکی میں بھی ماہر ہیں۔ ان کے گیت اور موسیقی کا مقصد سماج میں یکجہتی اور محبت کا پیغام دینا ہے۔ ان کا ماننا ہے کہ موسیقی کی کوئی سرحد نہیں ہوتی اور یہ ہر دل کو جوڑنے کی طاقت رکھتی ہے۔
بتول بیگم کو پہلے بھی کئی معتبر اعزازات سے نوازا جا چکا ہے۔ 2022 میں انہیں ناری شکتی ایوارڈ دیا گیا تھا۔ یہ اعزاز سابق صدر رام ناتھ کووند نے عالمی یومِ خواتین کے موقع پر دیا تھا۔ انہیں یہ ایوارڈ بھارتی لوک موسیقی کو عالمی شناخت دلانے اور خواتین کو بااختیار بنانے میں تعاون کے لیے دیا گیا تھا۔
بتول بیگم کا کہنا ہے کہ موسیقی میں وہ جادو ہے جو ہر دل کو چھو سکتا ہے اور لوگوں کو ایک ساتھ لا سکتا ہے۔ پدم ایوارڈ حاصل کرنا ان کے لیے نہ صرف فخر کا باعث ہے بلکہ یہ ان کے کام کو آگے بڑھانے کی تحریک بھی دے گا۔ یہ اعزاز راجستھان اور پورے ملک کے لیے فخر کا لمحہ ہے۔
بیگم بتول دو سال قبل فرانس میں اپنی پرفارمنس دے چکی ہیں۔ نمستے فرانس پروگرام میں استاد امجد علی خان، ایل۔کے۔ سبراہمنیم، گریمی ایوارڈ یافتہ رکی کیج سمیت کئی بڑے فنکاروں کے ساتھ بیگم بتول نے کارکردگی پیش کی تھی، جس کے بعد ان کی دنیا بھر میں چرچا ہوئی۔ "کیسریا بالما آؤ سا، پدھارو مہارے دیش" کو بہترین انداز میں گاتی ہیں۔ بیگم بتول دنیا کے 25 ممالک میں پرفارمنس کر چکی ہیں۔
ایک انٹرویو میں بیگم نے بتایا تھا کہ انہوں نے پہلی سے پانچویں جماعت تک تعلیم حاصل کی ہے۔ آہستہ آہستہ گانے کی طرف رجحان ہو گیا۔ انہوں نے بتایا کہ ان کے دادا اور چچا انہیں تعلیم حاصل کرنے کی اجازت نہیں دے رہے تھے، جس کی وجہ سے وہ تعلیم مکمل نہ کر سکیں۔
بتول بتاتی ہیں کہ ان کا دل بھجن میں لگ گیا تھا، اس لیے وہ بھجن گاتی رہیں۔ لیکن لوگ کہتے تھے کہ "مندر کیوں جاتی ہو؟" مگر انہوں نے کسی کی نہ سنی اور بھجن گاتی رہیں۔
