نئی دہلی/ آواز دی وائس

امریکہ کے ساتھ تجارتی جنگ کے درمیان، ہندوستان میں چینی سفارت خانے نے 1 جنوری سے 9 اپریل 2025 کے درمیان 85,000 سے زیادہ ہندوستانی شہریوں کو ویزے جاری کیے ہیں۔ جسے دونوں ممالک کے عوام کے درمیان تعلقات کو مضبوط بنانے کی طرف ایک اہم قدم قرار دیا جا رہا ہے۔

 چینی سفیر سو فیہانگ کے مطابق 9 اپریل 2025 تک، ہندوستان میں چینی سفارت خانے اور قونصل خانوں نے اس سال چین کا سفر کرنے والے ہندوستانی شہریوں کو 85,000 سے زیادہ ویزے جاری کیے ہیں۔ انہوں نے  ایکس  پر لکھا کہ  چینی حکومت نے ہندوستان اور چین کے درمیان ہموار سفر کو آسان بنانے کے لیے کئی نرمیاں متعارف کرائی ہیں۔

آن لائن اپائنٹمنٹ کی ضرورت نہیں: ہندوستانی درخواست دہندگان اب بغیر کسی پیشگی آن لائن اپائنٹمنٹ کے اپنی ویزا درخواستیں براہ راست ویزا سینٹرز پر جمع کرا سکتے ہیں۔ 

بائیو میٹرک استثنیٰ: چین کے مختصر مدت کے دورے کرنے والوں کو بائیو میٹرک ڈیٹا فراہم کرنے سے استثنیٰ حاصل ہے۔

ویزا فیس: چین نے ویزا فیس بھی کم کر دی ہے۔ اس کے علاوہ ویزا کی منظوری کے لیے ٹائم لائن کو مختصر کر دیا گیا ہے۔

 سیاحت: چین ہندوستانی سیاحوں کے لیے سفر کو فعال طور پر فروغ دے رہا ہے۔

جب سے امریکی صدر کا عہدہ سنبھالا ہے، ڈونلڈ ٹرمپ دوسرے ممالک پر بھاری محصولات عائد کر رہے ہیں۔ خاص طور پر چین پر، جو اس کا سب سے بڑا اقتصادی حریف ہے بلکہ ایک بڑا تجارتی پارٹنر بھی ہے۔ چینی سفارت خانے کے ترجمان یو جِنگ نے ہندوستان-چین اقتصادی اور تجارتی تعلقات کی اہمیت پر زور دیتے ہوئے کہا کہ "چین ہندوستان اقتصادی اور تجارتی تعلقات باہمی فائدے پر مبنی ہیں۔ امریکی محصولات کا سامنا کرتے ہوئے، دو سب سے بڑے ترقی پذیر ممالک کو مشکلات پر قابو پانے کے لیے ایک ساتھ کھڑا ہونا چاہیے۔

یو جینگ نے مزید کہا کہ تجارتی اور ٹیرف کی جنگوں میں کوئی فاتح نہیں ہوتا۔ تمام ممالک کو وسیع مشاورت کے اصولوں کو برقرار رکھنا چاہیے، حقیقی کثیرالجہتی پر عمل کرنا چاہیے، مشترکہ طور پر ہر طرح کی یکطرفہ اور تحفظ پسندی کی مخالفت کرنی چاہیے۔